Минһаҗев Фәрит Хәсән улы бакыйлыкка күчте. Шушы көннәрдә Яншык зиратында җирләнде. Авылдашыбыз яхшы кеше иде, мәрхәмәтле, ярдәмчел, кешеләргә яхшы мөнәсәбәттә булды. Урыны җәннәттә булсын. Туганнарының тирән кайгыларын уртаклашабыз.
Яншык зиратында койма кору эшләре, ниһаять, тәмам булды. Бүген иртән авылдашларыбыз Миша, Хәмзә, Фәрхәт, Әбүзәр коймага соңгы саморезны бордылар. Мишага аеруча рәхмәт, ул ике көн дәвамында әйдәп баручы булды. Тулаем алганда зират коймасын яңарту 3 елга сузылды. Хәзер инде ул дистә еллар хезмәт итсен. Бу изге эштә катнашкан барлык ирләргә, хатын-кызларга, сәдакаларын кызганмаучы авылдашларыбызга зур рәхмәт. Яншыкта яшәп гүр иясе булган әти-әниләребез, әби-бабайларыбыз, туганнарыбызның рухлары шат булсын!
Бүген Яншык зиратында эшләр дәвам итте. Килгән кешеләргә рәхмәт. Тагын әз генә эш калып бара. Иртәгә 4 сентябрь иртән кемнәр килә ала, рәхим итегез. Үзегез белән шуруповерт алырга онытмагыз.
Шушы составта бүген хатын-кызларыбыз зират коймасын буяп бетерделәр. Бик тырышып һәм җитез эшләделәр. Осталыклары елдан-ел арта. Мәсәлән, узган елны 170 метр араны буярга 2 көн кирәк булса, бүген 214 метр ара нибары 2 сәгать эчендә буялды. Бик зур рәхмәт! Изге эшегездән Аллаһы Тәгалә разый булсын!
Авылыбызның активисты Шәрәфиев Васил Газизҗан улына бүген 15 август көнне 65 яшь тулды. Авылдашыбыз башлангычы белән Яншыкта бик күп эшләр башкарылды. Авыл көннәре, зиратта өмәләр, койма тоту, зиратта йорт булдыру, күпер төзү, мәчетне төзекләндерү һ.б. Васил Шәрәфиев — бу эшләрдә башлап йөрүче. Барлык планлаштырган эшләрне ул, авылдашлар белән бергәлектә, эзлекле рәвештә ахырына кадәр башкарып чыга, ахырдан керемнәр һәм чыгымнар буенча хисап тота. Аның активлыгы башка авылдашларны да канатландыра: авыл кирәк-яраклары өчен сәдәка бирергә, туган нигезне төзекләндерергә, өмәләрдә катнашырга этәрә. Бу эшләр дәвамлы булсын иде. Шәрәфиев Васил Газизҗан улын юбилее белән котлыйбыз! Сәламәтлек, иминлек, гаилә бәхете, күңел тынычлыгы телибез.
Авылыбызның фотографы, телевизорларны һәм башка техниканы оста ремонтлаучы Гыйльман Фәйзуллинга 6 август көнне 60 яшь тулды. Гыйльман Фәйзуллин Яншык өчен зур эш башкара — эчкерсез рәвештә, бер тиен акча алмыйча авылның фотоелъязмасын алып бара. Аннан башка бер генә чара да узмый: Сабантуй, Авыл көне, зиратта өмә һ.б. Анда сурәтләнгән кешеләр, җырдагыча, кайсы исән, кайсы юк инде. Әлеге чаралардан фотолар зур архив булып тупланып бара. Аларны безнең балалар һәм оныклар караячак. Авылдашыбыз Гыйльман Фәйзуллинны чын күңелдән юбилее белән котлыйбыз. Исәнлек-саулык, гаилә бәхете телибез. Фотоаппарат объективы һәм тормыш объективы һәрвакыт шулай көйле булсын!
